میرزا عبدالقادر بېدل وفاتی نینگ 314 ییللیگیگه بغیشلنگن تدبیر تورکيه‌ده بۉلیب اۉتدی

میرزا عبدالقادیر بېدل — مشهور و عارف شاعر وفاتی نینگ 314 ییللیگی مناسبتی بیلن، استانبول شهریده «بېدل اورسی» تدبیری تشکیل اېتیلدی. اوشبو تدبیر «سخن» مدنیت انجمنی، «بېدل شناسلیک » جمعیتی، تورکيه یازووچیلر اویوشمه‌سی همده‌ استانبول مدنیت بیلیم یورتی نینگ «حافظ شېرازی تدقیقات مرکزی» همکارلیگیده بۉلیب اۉتدی.مراسمده افغانستان و تورکيه‌دن کېلگن بېدل اخلاصمندلری، تدقیقاتچیلر، شاعرلر همده‌ مدنیت اربابلری اشتراک اېتدیلر. اولر بېدل میراثینی یادگه آلیب، اونینگ ایجادی و تفکر دنیاسینی تورلی جهتلردن تحلیل قیلیشدی. بیرینچی نطقنی «سخن» مدنیت انجمنی باشلیغی ظهور مظهر سۉزگه چیقیب، بېدل نینگ حیات یۉلی همده‌ بېدل اورسی نینگ اۉتکزیلیش تاریخی حقیده معلومات بېردی. او بو تدبیرنی روحي و ادبي جهتدن مهم‌ دېب بهاله‌دی و اونی تصوفي تفکر بیلن ینه‌ بیر ملاقات میدانی صفتیده تقدیم اېتدی.شوندن سۉنگ، استانبول مدنيت بیلیم یورتی فارس تیلی و ادبیاتی پروفیسوری دوکتور تورغآی شفق بېدل شعریتی نینگ تورکيه ادبیاتیگه تأثیرینی تحلیل قیلدی. او هند اسلوبی بیلن عثمانلی شعري عنعنه‌لری آره‌سیده‌گی اۉخششلیکلرگه توخته‌لدی.کېینراق ادبیاتشناس، شاعر و ژورنالیست شهباز ایراج بېدل نینگ بدیعي سیمالر تیزیمی، عباره‌لرده‌گی مرکّبلیک و گۉزللیک حقیده گپیردی.بېدلشناس محمد پوپل اېسه بېدل شعریتیده‌گی «عاجزلیک» توشونچه‌سینی تحلیل قیلدی و بو سۉز قنده‌ی قیلیب کۉپلب غزللر نینگ معنا هسته‌سی صفتیده خدمت قیله‌یاتگنینی کۉرسه‌تدی. اونینگ آرتیدن «بېدل شناسلیک» جمعیتی باشلیغی عبید صوفی بېدل اثرلری نینگ مضموني تحلیلینی بېردی و اونینگ تاریخي برقرارلیگینی توشونتیردی.مشهور شاعر سعدلله حقيار بیر نېچته غزللرنی اۉقیب، تدبیرگه روحي حالت بغیشله‌دی. اورانوس مصمم و نقیب خطیبی هم بېدل شعرلرینی مهارت بیلن اۉقیشدی.دستورگه یکون یسه‌گن اېسه تنیقلی صنعتچی قَیس معروف نینگ یوره‌کدن اجرا اېتگن موسیقه‌لی چیقیشی بۉلدی. او بېدل غزللرینی ایلیق و آهنگدار تاووش بیلن کویلب، اشتراکچیلر نینگ آلقیشیگه سزاوار بۉلدی.